MART-MARIÉ UYS

Mart-Marié Uys is 'n bekende rubriekskrywer met 'n diep belangstelling in die Afrikaner se denke, aanpassing en groepsidentiteit. Sy het reeds in 1998 haar meestersgraad in Sielkunde aan die Universiteit van Pretoria voltooi, met 'n verhandeling wat Afrikaners en hul groepsidentiteit destyds ondersoek het. Later voltooi sy ook haar PhD in Sielkunde met lof, steeds aan dieselfde universiteit.

Uys het naam gemaak as skrywer van insiggewende rubrieke in verskeie koerante en tydskrifte, waar sy sosiale en kulturele temas met fyn aanvoeling en intellektuele diepte verken. Sy woon in Lynnwood, Pretoria, waar sy haar lewenslange belangstelling in die Afrikaner se sosiale landskap uitleef.

Sy het twee kinders wat sy op haar eie grootgemaak het. Haar dogter, Alet Uys, is 'n familieregprokureur wat vir meer as tien jaar haar eie firma, Alet Uys Attorneys, bedryf en boonop tans met haar LLD besig is. Haar seun, Johan Uys, is 'n spesialis-data-analis by 'n bekende aktuariële maatskappy in Pretoria.

Skryf en taal loop diep in haar familie. Haar ma, Alet Wingard, was self destyds 'n skrywer en het vir baie jare 'n betekenisvolle bydrae as medewerker by die ATKV en as skrywer by Taalgenoot gelewer. Haar pa, Johann Wingard, 'n ingenieur, deeltydse boer en sakeman, was 'n trotse Afrikanerman. Hy het intens in Afrikanersake belanggestel en het ook kundige rubrieke oor Afrikaners geskryf en menige intellektuele gesprekke met bekendes daaroor gevoer.